प्रसिद्ध गायिका गीता माळी यांचे अपघाती निधन झाले आहे. अमेरिकेतील आपला शो आटोपून मुंबई विमानतळावरून नाशिकला परतत असतांना गीता माळी यांच्या कारचा जोरदार अपघात झाला. या अपघातात त्यांचा दुर्दैवी मृत्यू झाला असून त्यांचे पती अॅड. विजय माळी यांची प्रकृती गंभीर आहे असे सांगितले जात आहे.
मटाच्या रिपोर्ट नुसार मुंबई- नाशिक महामार्गावरील शहापूर शिवारात एकता हॉटेलसमोर कार आणि टँकरची धडक होऊन हा अपघात झाला. गीता माळी यांच्यासोबत त्यांचे पती विजय माळीसुद्धा या अपघातात जखमी झाले असून शहापूर जिल्हा रुग्णालयात त्यांच्यावर सध्या उपचार सुरू आहेत.
गीता माळी या गेल्या दोन महिन्यांपासून अमेरिकेत गायनाचे कार्यक्रम करीत होत्या व आज सकाळीच त्या भारतात परतल्या होत्या. यावेळी एअरपोर्टहून नाशिकला परतत असतांना महामार्गावर झालेल्या या अपघातात त्यांना गंभीर दुखापत होऊन दुर्दैवी मृत्यू झाला. गीता माळी यांच्या अपघाती निधनाने त्यांच्या चाहत्यांना मोठा धक्का बसला आहे.
