कोरोनाचे मोठे संकट जगासमोर उभे असताना राज्यातील बहुतांश खाजगी डॉक्टरांनी त्यांचे दवाखाने बंद केले आहेत. कोरोना सोडून इतर अनेक रोग अस्तित्वात आहेत पण अशा रोगांवर इलाज न मिळाल्यामुळे रुग्णांचे अतोनात हाल होत आहेत. नागरिकांच्या आरोग्याच्या दृष्टीने ही एक फार गंभीर बाब असून असल्या डॉक्टर विरुद्ध आपत्ती व्यवस्थापन कायद्यानुसार कारवाई करण्यात येईल असे आयुक्त दीपक म्हैसकर यांनी सांगितले.
कोरोना संशयित व्यक्तींवर उपचार करणाऱ्या काही डॉक्टरांना देखील कोरोनाची लागण झाल्याचे प्रकार समोर आले. त्यानंतर अनेक ठिकाणी खाजगी दवाखाने व डॉक्टरांनी आपले क्लिनिक बंद ठेवण्याचे प्रकार सुरू केले आहेत या पार्श्वभूमीवर विभागीय आयुक्त डॉ. दीपक म्हैसेकर यांनी सर्व जिल्हाधिकारी यांना त्यांच्या जिल्ह्यातील सर्व खाजगी दवाखाने व ओपीडी सुरू ठेवण्याचे आवाहन करण्याचे आदेश दिले आहेत. तसेच या आवाहनानंतर देखील खासगी दवाखाने व ओपीडी बंद ठेवल्या जात असतील तर त्यांच्यावर थेट आपत्ती व्यवस्थापन कायदा २००५ व महाराष्ट्र कोविड उपाययोजना २०२० व साथ रोग नियंत्रण कायदा १८९७ नुसार कारवाई करण्याचे आदेश सर्व जिल्हाधिकारी यांना दिले आहेत. तसेच संबंधित डॉक्टरांची नोंदणी त्वरित रद्द करण्याची शिफारस इंडियन मेडिकल कौन्सिल व अन्य सक्षम प्राधिकरण यांच्याकडे करण्याचे देखील आदेश दिले आहेत.
